كتب كريم المنشاوي
ده كان سؤالى انا اول ما سمعت الاسم ده . فى يوم من الايام ركبت تاكسى وقلت للراجل ودينى مكان كذا .فرد الراجل قلى اتفضل وبعد ما مشينا شويه لقيت الراجل دخل طريق غلط . قلت ياعم رايح فين .فرد عليا وقلى معلشى اصلى ماخدش الاستمورننج بتاعى . طبعا انا ما سكتش. وقلت ده ايه إن شاء الله ؟ فرد عليا مستغرب ليه هو انت ماتعرفش يعنى ايه الاستمورننج ؟ قلت لا والله .فرد عليا انا اقولك يعنى الاستمورنج. الاستمورننج ده السندوتش وكوباية النسكافيه وحجر الشيشة وبس !وانا من غير الاستمورننج بتاعى بكون تايه . اه يعنى الاستمورننج ده اهم حاجه عندك ؟ ايوه من غير الاستمورننج ما اعرفش اشتغل . طب كلمة الاستمورننج دى جت منين ؟ فرد عليا قالى ده التطور العصرى لكلمة الاصطباحه فبدل ما اقول لحضرتك ما اصطبحتش اقول ما اخذتش الاستمورننج بتاعى . كويس والله ادينا بنتعلم . وفى اليوم ده كانت الطريق واقفة فطال الحديث بينى وبين السائق اللى عرفت انه اسمه على . وعرفت إن عم على ده ليه اراء كتيره فى حال البلد . بس لو عم على كان خد الاستمورننج بتاعه مكانشى دخل طريق غلط ومكناش اتعطلنا بس على العموم كل تأخيره وفيها خيره. معلشى الحكاية النهارده مش حكاية لو لكنها حكاية الاستمورننج