صدق أو لا تصدق : رجل هندي حامل منذ 36 عاما

كتب حماده جمعه

اه زى ماانت قرأت كده عن راجل وحامل اسمه “Sanju Bhagat” من الهند ،
الموضوع بدا وهو عنده سنتين وكانت واضح إن بطنه كبيرة جداً وكان كل ما يكبر فى السن بطنه تكبر معاه وكان طبعاً بيتعرض لتنمر وسخرية من أهل القرية وبينادوله بالراجل الحامل ،
لحد سنة 1999 أما بقى عنده 36 سنة معدته بقت كبيرة جداً وكانبي واجه صعوبة فى التنفس بسببها فاتنقل للمستشفى عشان يعمل عملية جراحية.
أول ما الدكاترة شافوه اعتقدوا إنه مجرد ورم بس كبير شوية فى معدته ولكن أما فتحوا بطنه وبدأوا فى العملية كانت
مفاجأة بالنسبة لهم ، الدكتور حسّ بعضم جوا بطنه وكل شوية يطلع طرف جسم ومرة شعر ومرة طرف تانى ومرة عضو تناسلى لحد ما جسم الجنين كله طلع ، وطبعاً واقفين مبهورين ومش مصدقين اللى بيحصل.
الحالة اللى بيعانى منها الراجل ده تُعتبر من أغرب الحالات الطبية اسمها “fetus in fetu” وده اضطراب نادر جداً جداً بيحصل لحالة واحدة ما بين 500 ألف حالة ولادة ، بيحصل أثناء تكوين أجنة التوأم فجنين منهم بيحمل الجنين التانى وبينمو جواه ، يعنى الجنين اللى طلع من بطن الراجل الهندى كان توأمه وهو كان شايله فى بطنه لمدة 36 سنة!!

وطبعاً Sanju Bhagat معندوش مشيمة لإنها بتبقى موجودة عند الست بس فالجنين كان بياخد إمداداته بشكل مباشر من دم سانجو ، يعنى الجنين نما زى الطفيل كده داخل جسمه وكان بيتغذّى من جسم سانجو عن طريق حاجة زى الحبل السُرى متصله بشكل مباشر بدمه لحد ما الجنين ده يبدأ ينمو ويضُر الشخص فيبدأ الدكاترة يتدخلوا ، فى العادى الحالات اللى زى دي بيموتوا هما الاتنين (التوأم) لكن فى حالة سانجو عاش وفى بطنه توأمه فتعتبر معجزة ، وبعد ما انتهت العملية كل المشاكل اللى كانت عنده راحت وعايش حياته دلوقتي طبيعى جداً بس هتفضل حالته معروفه بإنها من أغرب الحالات الطبية اللى حصلت فى العالم