شبكة المراسل اليوم المصداقية … والخبر اليقين
مقالات مشابهة
لو كنت معتقد ان الفيوم مافيهاش الا شلالات وادى الريان يبقى لازم تقرا البوست دا!
قرية المختلطة بالقرب من قرية ابو جندير بمركز اطسا بتبعد حوالى ٣٤ كيلو متر جنوب غرب مدينة الفيوم و مستخبى فيها سبع شلالات
اتكونت بفعل وجود منخفض الفيوم و اللى بيتدرج من ارتفاع ٢٥ متر فوق مستوى سطح البحر فى الجنوب و حتى ٤٥ متر تحت مستوى سطح البحر فى الشمال ليصل لبحيرة قارون (اكثر منطقة انخفاضا فى الفيوم) لذلك اشار البعض ان من جنوب لشمال الفيوم مستوى ارض بينخفض ٢ متر تقريبا كل ما مشينا كيلومتر و دا اللى كون الشلالات او الهدرات و اللى اصبحت بعد كدا محط انظار الحكومة المصرية فى العهد الملكى للاستفادة منها لتوليد الكهرباء!
المنطقة اللى فيها المحطة من اجمل المناطق فى محافظة الفيوم اللى بتتجلى فيها طبيعة ريف الفيوم الساحر اللى مش هاتقدر تشوفه فى اى مكان تانى فى مصر الا فى الفيوم، فالمنطقة مطلة على وادى واسع بيخترق ارضه مصرف الوادى اللى بينقل مياة الرى الزائدة لبحيرة قارون و يحد الوادى مدرجات مزروعة و اشجار النخيل و النباتات الطبية و العطرية. بننصح محبى الطبيعة و مشاهدة الطيور انهم يقضوا يوم هناك.
* ممنوع السباحة فى منطقة الشلالات لان اندفاعها قوى جداً و كمان يا ريت نكون حذرين على خطواتنا لأن المنطقة تدرجاتها كبيرة و طبيعتها طينية.
