شبكة المراسل اليوم المصداقية … والخبر اليقين
ممدوح غريب
ــــــــــــــــــــ
اليوم انقل رساله من مواطن بسيط يتكلم بعفويه ولذا نقلت كل كلمه قالها دون حزف اوالتحفظ على اى كلمه قالها يصف فيها مايعانيه ويطلب من أولى الامر ان يعيش اويعامل معامله انسانيه وبرغم الوجع والالم الذى به انه كان متحفظا على الالقاب هذا مواطن واحد من 90 مليون مواطن يعبر عما بداخله فهل بجد صدى لصوته ام انه مجرد كلام عابر من المسئوليين وعلى رأسهم السيد رئيس الجمهوريه
واليكم مانشره على صفحة التواصل الاجتماعى
رسالة للريس واتمنى تلف الفيس لحد ما ألاقى رد من رئاسة الجمهورية …
#AbdelFattah_Elsisi – #عبد_الفتاح_السيسي
بص يا ريس انا هدخل فى الموضوع على طول 
😊
حضرتك انا مش هتكلم فى مشاكل كبيرة
انا حضرتك ميفرقش معايا مجدى مكين مين اللى قتله ولا رچينى ولا العاصمة الجديدة ولا قناة السويس الجديدة ويتحرق الجنيه ع الدولار ولا ان تيران وصنافير مصرية ولا سعودية لانها مصرية واذا خدوها دلوقتى مسيرنا هنجيبها تانى انا مشاكلى بالنسبة لسيادتك اتفه من كدة 
😒😒
البيضة بقت بجنيه ونص انت مُدرِك ..
العدس مبقاش للفقرا ..
وجبة الفول ع العربية بعد ما كنت بخمسة بقت بسبعة ونص ..
البمبارز زاد ٤٠٪ اه وربنا
التونه بقت ب 30 جنيه
البصل و البطاطس ب 8 جنيه
سندوتش البطاطس برا بقي بـ 5 جنيه بقينا نجوع بجد 
✋
اكل الغلابه غلي اوي يا ريس مش هقولك عاوزين لحمة
وفراخ ابسط حقوقنا مبقتش موجودة متجوش علي اكل الغلابه يا سعادة الريس متجوووش علي اكل الغلابه يا سعاادة الريس ✋
طيب الناس الغلابه اللي كانوا بيتغدوا بطاطس مقليه
وشويه فول هياكلوا ايه ؟؟
ده غير الزيادة الى بيزودها التجار !!
انت عارف يا ريس ان المرتب بتاع المواطن بقى بيجيب تلت الحاجة الى كان بيجيبها الاول
وكأن الى بيقبض ١٠٠٠ بقى بيقبض ٣٥٠ 
😏😏
طبعاً مش هقول لحضرتك على المواصلات وانها
زادت برضه ماهو صحيح ماكله زاد يعنى جات على دي؟
واكيد فكرة اننا نوفر مبقتش موجودة لإن الي جاى
بقى اقل من اللى رايح 
😷
والشاب الي عايز يكمل نص دينه والبنت الي عايزه تعمل جهاز بسيط .. دي بقت احلام شبه مستحيله … لما انتخبنا حضرتك كنا عاوزينك تخرجنا من الدمار الي كنا فيه يا ريس
مش ندخل علي مجاعه ومجزره علي لقمة العيش البسيطه !! 
😕😕
😔
كل الي عايزة اقوله لحضرتك ان المواطن الغلبان تعب اوى سواء معاه فلوس او مش معاه مفيش حاجه بتكفي و المفروض يكون ده من اولوياتك ياسياده الريس 😏
👌
#الناس_بتكلم_نفسها 😔 يعنى دلوقتى نمووت من الجوع مناكلش ولا نولع في البلد ولا نعمل ايه الواحد فعلاً تعب 😔
#الأسعار_نار
